पोखरा, १ जेठ । नेपाल खेलकुद पत्रकार मञ्च गण्डकीद्वारा आयोजित दशौँ पोखरा स्पोर्ट्स अवार्डमा टेनिसका प्रदीप खड्का र महिला आर्चरीकी नारायणी भण्डारी उत्कृष्ट खेलाडी घोषित भएका छन्। बिहीबार पोखरामा आयोजित विशेष समारोहमा उनीहरूलाई मुख्य अवार्ड प्रदान गरिएको हो।
पुरुषतर्फ प्रदीप खड्काले भलिबलका सञ्जु विक्रम शाह र जुडोका विक्रम टी खत्रीलाई पछि पार्दै उपाधि जिते। उनले यसअघि पनि यो अवार्ड एकपटक जितिसकेका छन्, जसले उनको निरन्तर उत्कृष्ट प्रदर्शनलाई झल्काएको छ। महिलातर्फ नारायणी भण्डारीले आर्चरीकी मोनिका राना र जुडोकी मनिषा तामाङलाई पछि पार्दै उत्कृष्ट खेलाडीको अवार्ड हात पारिन्। दुवै विजेताले पुरस्कारस्वरूप इलेक्ट्रिक स्कुटर प्राप्त गरेका छन्।
समारोहमा विभिन्न विधामा पनि सम्मान तथा अवार्ड वितरण गरिएको थियो। लाइफटाइम अचिभमेन्ट अवार्ड ओलम्पियन टिका बहादुर बोगटीलाई प्रदान गरिएको छ। खेल क्षेत्रमा लामो समयदेखि योगदान पुर्याउँदै आएका बोगटीलाई चाँदीको करुवा र ताम्रपत्रले सम्मान गरिएको हो।
त्यसैगरी पिपुल्स च्वाइस अवार्ड भलिबलका खेलाडी राजन दर्लामीले प्राप्त गरेका छन्। उनलाई पनि स्कुटर प्रदान गरिएको थियो। उदीयमान खेलाडी अवार्ड ब्याडमिन्टनकी निभा राईले प्राप्त गरिन् भने उत्कृष्ट प्रशिक्षकको अवार्ड एथ्लेटिक्सका सिद्धान्त अधिकारीलाई प्रदान गरिएको छ।
उत्कृष्ट खेल संघतर्फ कास्की जिल्ला क्रिकेट संघ सम्मानित भएको छ। विशेष अवार्ड क्रिकेटकी सुष्मा तामाङले प्राप्त गरिन् भने वर्ष उत्कृष्ट खेल पत्रकारको पुरस्कार दिननाथ बराललाई प्रदान गरिएको थियो।
मञ्चले यस वर्ष कुल ९ विधामा अवार्ड वितरण गरेको जनाएको छ। खेल क्षेत्रका उत्कृष्ट प्रतिभालाई सम्मान गर्दै आयोजना गरिएको यो कार्यक्रम गण्डकी प्रदेशको खेलकुद विकास र प्रोत्साहनका लागि महत्वपूर्ण मानिएको छ।
सम्बन्धित खवर
